Survivors security

Ubuyobozi bwa FARG ntibuzi icyo bukora, ntagenamigambi bugira, Depite Nkusi

zimwe mu nzu zubakiwe abacitse ku icumu Nyamugari zikabasenyukiraho hadateye kabiri

Abadepite bagize komisiyo ishinzwe gukurikirana ikoreshwa ry’imari n’umutungo bya Leta PAC bavuga ko FARG itita uko bikwiye ku iyubakwa ry’inzu zigenewe abarokotse Jenoside yakorewe Abatutsi batishoboye nk’uko bigaragazwa na Raporo y’Umugenzuzi Mukuru w’Imari n’Umutungo bya Leta. Leta yari yasohoye amafaranga yo kubaka inzu 3000 nyamara hubatswe inzu 350 nazo zubakwa nabi inyinshi zihita zisenyuka mu mezi abiri gusa. 

FARG ishinjwa amakosa 11 ajyanye cyane cyane no kudashyira mu bikorwa imishinga yateguye, kudakurikirana ibikorwa by’abo ishinzwe kwitaho nk’iyubakwa ry’izi nzu zagenewe abarokotse Jenoside yakorewe Abatutsi batishoboye.

Ubwo yabasomeraga amwe mu makosa, Visi perezida wa PAC, Karenzi Theoneste, yavuze ko hari inzu zubatswe mu Karere ka Huye na ba Rwiyemezamirimo zituzuye.

Hon. Karenzi yasobanuye ko bitewe n’uko abagenerwabikorwa bari bayakeneye bapfuye kuzakira uko zimeze, izindi nazo zikaba zisenyuka zitaramara n’amezi abiri zubatswe. “Nk’amazu 30 yubatswe afite agaciro ka miliyoni 126 hanyuma 25 muri yo agira ibibazo.”

Depite Nkusi ukuriye PAC we yagaragaje ko FARG ifite ikibazo cy’igenamigambi no kutamenya icyo ishaka n’icyo igomba gukora kuko hari nk’amazu yabaga ateganijwe kubakwa ntiyubakwe. Ati “Sinumva ukuntu haba hateganijwe kubakwa amazu ibihumbi bitatu hakubakwa 350 abantu bakanayasiga atuzuye”.

Uyu mudepite yavuze ko iki kibazo cyibazwa na benshi kuko ngo na Perezida wa Repubulika y’u Rwanda yigeze kubyibaza mu nama y’umushyikirano.

Depite Nkusi yagize ati “Ariko kubakira abarokotse bizarangira ryari, nyuma y’imyaka 20! Ko atari ikibazo cy’amafaranga yabuze, n’ayubakwa akubakwa nabi nyuma y’amezi abiri ugasanga inzu yasenyutse!”

Undi mu bagize PAC nawe ati “Inzu igahirima twaravuze tuti nyabuna mutange ibikoresho inzego z’ibanze zibyinjiremo ibindi binakorwe mu rwego rw’umuganda ku buryo ibibazo birangira. Nyuma y’imyaka 20 murumva abo bantu babayeho bate koko!”

Usibye izi nzu zavuzwe, hari n’ibindi bibazo nk’ibi byagiye bigaragara hirya no hino mu gihugu mu turere dutandukanye. Na none kandi hari nk’imishinga yari igamije gutanga matungo itarakozwe kandi yari yarashyizwe muri gahunda ndetse ahandi ho ugasanga abarokotse Jenoside yakorewe Abatutsi. bahawe amatungo atameze neza nyuma y’iminsi mike agapfa.

Mu kwisobanura, Nabahire Anastase Visi Perezida w’Inama y’Ubutegetsi ya FARG yasobanuye ko ibyo bibazo byatewe n’amateka y’abayoboye iki kigo mbere ariko ko ubu bari kugenda bayakosora.

Nabahire yakomeje asobanura ko hari igihe FARG yari gifite abakozi ku rwego rw’uturere bigezeho bakurwaho hasigara abo mu nzego z’ibanze bityo kubera ubwinshi bw’ibikenewe gukorwa haba ibibazo byo kugenzura no gukurikirana ibikorwa byabo.

Nabahire ariko yemeje ko aho ibyo bibazo bigaragarijwe abakozi bo kuturere bagiye gusubizwaho kugira ngo bajye bakurikirana uko bikwiye ibikorwa by’abagenerwabikorwa ba FARG.

PAC ntiyanyuzwe n’ibi bisobanuro kuko ngo kuba ku turere nta bakozi bari bahari ataribyo byatumye ibintu bipfa.

Umuyobozi wa FARG, Theophile Ruberangeyo, we yavuze ko koko bafite inshingano zo gukurikirana ibikorwa ariko ko bipfira mu turere tutabagezagaho raporo ariko ko kuri ubu hari abasigaye bazitanga.

Yijeje ko mu gukemura ikibazo cy’imyubakire y’amazu ubu bari gukorana n’inkeragutabara kuko arizo zubaka neza bityongo ibyo bibazo by’amazu asenyuka n’atabwa ntibizongera kubaho.

Ruberangeyo yakomeje avuga ko ubu bari gukosora amakosa yagaragaye kandi ko hari intambwe bateye bayakosora nk’ayagaragajwe na Raporo y’Umugenzuzi w’Imari umwaka wabanje.

Muriyo harimo kuba bafite noneho umubare w’abagenerwabikorwa babo n’ibyiciro barimo mu gihe mbere batari bazwi. Ubwo FARG yitabaga PAC mbere yo kugezwaho amakoza ifite, Abadepite babanje gutungurwa n’uko Perezida w’Inama y’Ubutegetsi w’iki kigo atitabye kandi ngo bwari ubugira kabiri abikoze.

Visi Perezida w’iyi Komisiyo Karenzi Theoneste yavuze ko ibyo bifatwa nk’agasuzuguro by’umwihariko ku Banyarwanda.

Aha umuyobozi wa FARG yatangaje ko perezida w’inama y’ubutegetsi atari azi ko agomba kuzana nabo kuko yibagiwe kubimubwira.

By Florence Kankwanzi, iGIHE.COM

edited here by Al.G

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s