Survivors security

Nyuma y’imyaka 21 ibihumbi by’abacitse ku icumu nta cumbi

Inzu y'uwacitse ku icumu

Inzu y’uwacitse ku icumu/Photo T. Kisambira

Ikigega cy’igihugu gishinzwe gutera inkunga abarokotse Jenoside yakorewe Abatutsi batishoboye (FARG) bwatangaje ko hagikenewe imbaraga nyinshi mu gusana no kububakira bundi bushya amacumbi, igikorwa bwemeza ko gikeneye amafaranga y’u Rwanda asanga miliyari 36.

Ikibazo cy’amacumbi y’abarokotse Jenoside asenyuka mu buryo budasobanutse, n’icy’abatarabona aho bakinga umusaya magingo aya, ni bimwe mu byo Abadepite bagize Komisiyo ishinzwe gukurikirana imikoreshereze y’imari n’umutungo bya Leta (PAC) bavuga ko basanze bikiri ingutu mu ngendo bagiriye mu turere dutandukanye mu gihugu.

Mu biganiro PAC yagiranye na Minisiteri y’ubutegetsi bw’igihugu kuri uyu wa Mbere, yagaragaje ko biteye inkeke kubona nyuma y’imyaka 20 hakiri abarokotse Jenoside batuye mu nzu zenda kubagwa hejuru, n’abatarabona aho bakinga umusaya.

Umuyobozi wa FARG, Theophile Ruberangeyo, yemeranya n’aba badepite ko hari abarokotse Jenoside bagifite ibibazo uruhuri, byiganjemo iby’abatarabona amacumbi n’abayahawe agasenyuka hadaciye kabiri.

Ruberangeyo asobanura ko kuva muri 1994 hamaze kubakwa inzu zisaga ibihumbi 44 z’abarokotse Jenoside batishoboye, ariko ngo hari izamaze gusenyuka bitewe n’uko zubatswe hutihuti, ba rwiyemezamirimo batabaye inyangamugayo bakayubaka nabi, ndetse na bamwe mu bacitse ku icumu bagiye bayafata nabi.

Yagize ati “Hari bamwe muri bo bagiye babona ko ari leta iyabahaye bagatangira kuyafata uko bishakiye, ibyo nabyo biza kuba ikibazo.”

Mu ibarura FARG ivuga ko yakoze mu mwaka wa 2013, yasanze hari inzu 3036 z’abacitse ku icumu batishoboye zikeneye gusanwa na leta kuko ba nyira zo nta bushobozi bafite.

Iri barura kandi ryagaragaje izindi nzu 4500 ba nyira zo bashobora kugerageza kwisanira, ariko leta ikabunganira mu buryo bumwe cyangwa ubundi.

Ba nyir’inzu zisaga 6000 bandi bo basanzweho imyumvire igikeneye amasomo, kuko inzu bazifata nabi ku bwende, barakeburwa bagasabwa kuzitaho bazisana, aho kugira ngo zibasenyukireho bazirebera kandi bafite ubushobozi.

Kuri aba byagaragaye ko leta yabafasha gusana no kongera guterura bundi bushya inzu zabo zangiritse bikomeye, hiyongeraho izindi nzu 1687 zigomba kubakirwa abacitse ku icumu batishoboye batigeze bazihabwa, byose hamwe bigatwara amafaranga asaga miliyari 36 nk’uko bisobanurwa n’umuyobozi wa FARG.

Uyu muyobozi ariko anagaragaza ko hagikenewe uruhare rwa buri wese kugira ngo ibibazo byugarije abarokotse Jenoside barimo inshike, imfubyi n’abandi batishoboye babone amacumbi.

Avuga ko izi miliyari 36 zikenewe ari nyinshi cyane, ugereranyije n’ibyo ikigega gisabwa gukora byose, ku buryo ibi bidakwiye guharirwa leta gusa ahubwo abantu bakwiye kuyunganira.

Yagize ati“Ntabwo tujya turenza miliyari 27 kandi hakenewe miliyari 36 kandi hari ibigomba gukorwa byinshi bitandukanye harimo n’uburezi butwara 75%.Turavuga tuti ku bufatanye bwacu tugomba gufasha leta kugira ngo ayo mazu ashobore gusanwa.”

Minisitiri w’Ubutegetsi bw’igihugu, Francis Kaboneka, yunze mu rya Ruberangeyo asaba Abanyarwanda kujya bafatanya gukemura ibibazo bya bagenzi babo. Yagaragaje ko byaba bibabaje kuba inzu y’uwacitse ku icumu yamusenyukiraho abaturanyi barebera kandi bafite ubushobozi bwo kumufasha.

Uretse ibikorwa by’umuganda, ibya Army week n’ibindi bisanzwe byunganira leta mu gufasha abacitse ku icumu rya Jenoside batishoboye, FARG yagaragaje ko ubu hari ibikorwa bya AERG/GAERG biri kubafasha gukemura ibibazo bitandukanye birimo no kububakira amacumbi.

Kugira ngo ikibazo cy’amacumbi gikemuke burundu, Ruberangeyo avuga ko hafashwe ingamba zikarishye zo kurinda ko hagira uburiganya ubwo ari bwo bwose bwakorwa ku gutanga izi nzu abarokotse Jenoside batishoboye bubakiwe.

Ati“Tumaze kubibona ko hari abantu bahabwa inzu kabiri cyangwa bakazigurisha, tujya kwemereza abantu iwabo, aho barokokeye Jenoside. Tuziko bivunanye hari abo bivuna ariko hari n’abandi batabishaka bavuga ngo sinshaka gusubira iyo ngiyo ariko byo ni ngombwa kuko hariya mu kagari nibo bamuzi bazi n’ibyo yakorewe, yabonye inzu atagombye kubakirwa bwa kabiri cyangwa yaragurishije.”

Ikibazo cy’amacumbi y’abarokotse Jenoside yakorewe Abatutsi batishoboye kiri mu by’ibanze Umugenzuzi mukuru w’imari ya Leta yari yatungiye agatoki Minisiteri y’Ubutegetsi bw’Igihugu, ko harimo ibitagenda neza bikwiye gukosoka.

Inkuru ya Igihe.com

Related articles:

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s