Uncategorized

IBUKA na Sosiyete Sivile barasaba Leta indishyi ku barokotse Jenoside yakorewe Abatutsi

IBUKA ifatanyije n’urugaga rw’imiryango igize Sosiyete Sivile ikomeje kotsa igitutu Leta n’imiryango mpuzamahanga, gutanga indishyi ku barokotse Jenoside yakorewe Abatutsi mu 1994.

Itangazo rihuriweho n’umuryango uharanira inyungu z’abarokotse Jenoside yakorewe Abatutsi (IBUKA) n’urugaga rw’imiryango igize Sosiyete Sivile (RCSP), IGIHE dufitiye kopi rivuga ko guhera nyuma ya Jenoside, abarokotse bakomeje gusaba indishyi. Ubu busabe bwagaragaye muri gahunda yayobowe na IBUKA guhera mu mwaka wa 1997 ; aho yagaragaje ko indishyi ari uburenganzira budasubirwaho bw’uwarokotse nk’uko bigaragara mu masezerano mpuzamahanga, harimo n’imirongo ngenderwaho y’ibanze y’Umuryango w’Abibumye.

Egide Nkuranga visi perezida wa mbere wa IBUKA yatangarije IGIHE kuri uyu wa kane, ko iki gikorwa cyo gusaba indishyi ku barokotse Jenoside yakorewe Abatutsi, ari umushinga watangiye mu myaka yashize, nyuma uza guhagarara, ariko ngo ubu bawubyukije.

Yagize ati “Uwo mushinga twawutangije mu myaka ishize, uza guhagarara kubera impamvu zimwe na zimwe harimo n’iza politiki, ariko ubu twongeye kuwubyutsa, dusaba indishyi, kuko n’Itegeko Nshinga ry’u Rwanda ribyemera.”

Nkuranga akomeza asobanura ko kuva na mbere bifuje ko hajyaho itegeko rigena itangwa ry’indishyi ku barokotse Jenoside yakorewe Abatutsi, ariko noneho usibye kuzisaba Leta y’u Rwanda, IBUKA ivuga ko inazisaba n’imiryango mpuzamahanga.

“Indishyi dusaba, turazisaba Leta bwa mbere, ubundi tukanasaba imiryango mpuzamahanga ngo ibe yatanga indishyi (ku bushake) ndetse n’abakoze ibyaha bya Jenoside bagatanga indishi bivuye mu mitungo yabo.” Nkuranga yongeyeho.

Tumubajije impamvu bifatanyije n’Urugagaga rwa sosiyete sivili, Nkuraje yavuze ko ubusanzwe IBUKA nayo ibarirwa muri sosiete sivili, gusa ngo biri mu rwego rwo kugira ngo ijwi ry’icyo basaba rirusheho kumvikana.

Bimwe mu bigize indishyi, IBUKA na RCSP basaba Leta, ni ugusana ibyangiritse, kubakira amazu abarokotse Jenoside yakorewe Abatutsi, kubashakira abahanga mu buzima bwo mu mutwe (Psychologies) n’ibindi.

Abajijwe impamvu basaba indishyi Leta kandi isanzwe ifasha abarokotse Jenoside yakorewe Abatutsi binyuze mu kigega yashyizeho, FARG, Nkuranga asobanura ko indishyi zitandukanye n’ubufasha. Mu gifaransa yakoreshe amagambo “assistance” na “reparation”.

Yagize ati “Ubufasha Leta isanzwe iduha ni ubufasha busanzwe nk’uko n’ubundi iba isabwa gufasha abaturage bayo, kuba rero hari abarokotse batishoboye nabo bagomba gufashwa. Ibi rero bitandukanye cyane n’indishyi.”

Nkuranga avuga ko hateganyijwe ko hazajyaho ikigega, International Trust fund kizajya gikusanyirizwamo izo ndishyi.

Iryo tangazo ryo ku wa 28 Kamena 2013, ryashyizweho imikono na Prof. Jean Pierre Dusingizemungu, Perezida wa IBUKA na Munyamariza Edouard, Umuyobozi mukuru w’ihuriro rya Sosiyete Sivile.

IBUKA yari ihagarariye imiryango irimo AERG, AFTS, AOCM, ARG Impuhwe, ARGR, ASRG Mpore, Association Duhozanye, AVEGA Agahozo, Barakabaho Foundation, Benimpuhwe, Benishyaka, Duharanire Kubaho, Dukundane Family, GAERG na Uyisenga n’Imanzi.

Turacyategereje kumva icyo Leta ivuga kuri izo ndishyi isabwa na IBUKA ifatanyije na RCSP, kuko twagerageje kuvugana na Minisiteri y’Ubutegetsi bw’igihugu ntitubabone, gusa IBUKA ivuga ko ifite icyizere ko uyu mushinga uzashyirwa mu bikorwa.

Ifoto yo hejuru : Munyamariza wa RCSP, Nkuranga na Dusingizemungu bayobora IBUKA

 

Yanditswe kuya 4-07-2013 – Saa 15:35′ na Richard Dan Iraguha, Igihe.com 

Categories: Uncategorized

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s