Genocide Denial/ingengabitekerezo

Kwibuka20: Ingengabitekerezo ya Jenoside yongereye umurengo

Mu gihe icyumweru cy’icyunamo cyatangiraga mu kwibuka ku nshuro ya 20 Jenoside yakorewe Abatutsi, hagaragaye amagambo akarishye cyane asesereza bamwe mu bacitse ku icumu, byerekana ko mu Banyarwanda hakiri ingengabitekerezo ya Jenoside.

Mu makuru IGIHE yakuye muri Komisiyo y’igihugu ishinzwe kurwanya Jenoside(CNLG), ni uko hagiye hagaragara ibimenyetso by’ingengabitekerezo ya Jenoside mu baturage, nyamara uhamwe na byo ari icyaha gihanirwa n’amategeko ahana y’u Rwanda.

Muri ayo makuru IGIHE yakusanyije amwe mu matariki, ahantu, n’ibyo abantu bavuze, ariko amazina y’abakekwaho ingengabitekerezo uwayashaka ashobora kuyasanga muri CNLG.

Ingero zitandukanye z’ibyagaragaje ko ingengabitekerezo ya Jenoide itarashira

Ku itariki ya 27/3/2014, mu Kagali ka Kinunga mu murenge wa Remera Akarere ka Ngoma,hari umuntu wabwiye uwacitse ku icumu ngo “izi ngegera zirirwa zibyina Jenoside none reka iriya tuyicoce, ibe imbarutso ya bene wabo.Ngo yarongeye ati :”iyo ngegera y’umututsi nitindaho gato turayica dore bamaze kuba benshi.

Ku itariki ya 1/4/2014, umukobwa w’imyaka 14 y’amavuko wo mu murenge wa Rwempasha Akarere ka Nyagatare yumvise indirimbo z’icyunamo ati :”Ngaho ibyabo biratangiye bagiye guhena bahenure”

Ku ya 3/4/2014 undi wo mu murenge wa Kiziguro, Akarere ka Gatsibo yabwiye uwacitse ku icumu ngo yamutema nk’uko batemye benewabo, ngo nibe nabo amagufwa yabo yarabonetse ariko ay’uyu ngo ntazaboneka.

Naho ku itariki ya 7/4/2014 mu murenge wa Tabagwe, Akarere ka Nyagatare, hari umuntu wambitse imbwa umusaraba avuga ko arimo kwibuka.

Ku itariki ya 8/4/2014 mu mudugudu wa Kira, Akagali ka Kibenga, Umurenge wa Ndera, umugabo w’imyaka 32 yabwiye undi w’imyaka 31 ko indirimbo Munyanshoza aririmba z’icyunamo zivuga abishwe muri Jenoside abeshya nta bantu bapfuye.

Ku itariki ya 9/4/2014, mu mudugudu wa Kaduha ,Akagali ka Shanga, umuntu cyangwa abantu batarashobora kumenyekana, bagiye ku nka ya Mukamfizi Xaverine wacitse ku icumu bayiteragura ibyuma.

Ku itariki ya 9/4/2014, umugabo wo mu Biryogo mu Karere ka Nyarugenge, bamubajije impamvu atagiye kuri stade Kwibuka , arasubiza ngo”Ndibuka se nibagiwe iki ?”

Ku itariki ya 9/4/2014 nanone mu murenge wa Nyabirasi , Akarere ka Rutsiro abagore batatu bari kumwe baravuze ngo “igihe bahereye bibuka ubwo si uguterekera ?ngo hapfuye ba nyina waba bagore naho abandi ni uguta umutwe.

Ku itariki ya 9/4/2014 na none mu mudugudu wa Gasharu, Akagali ka Gacaca, umurenge wa Rubengera, Akarere ka Karongi hari umubyeyi wagaragaje abamutoteza bamuziza ko ahingira umukecuru wacitse ku icumu, bakamubwira ko nasubira kumuhingira bazamwirukana nk’uko birukanye MRND.

Ku itariki ya 9/4/2014 kandi, mu gihe cya saa kumi z’amanywa mu Kagali ka Giheke ,umugabo w’imyaka 33 y’amavuko ,mu gihe bari mu biganiro byo Kwibuka Jenoside yakorewe Abatutsi ,we yatse ijambo avuga ko Imana yajyaga itanga abantu bakicwa, ko n’abatutsi babaga batanzwe n’Imana.Ibi ngo byahise biteza umwuka mubi aho.

Mu mudugudu wa Nyarusange ,Akagali ka Nyamugali Umurenge wa Gasaka, Akarere ka Nyamagabe, kuwa 9/4/2014 hari umugabo wabwiye undi ngo “wa gatutsi we katurutse muri Nyaruguru sohoka nkwice !”

Hirya no hino mu Rwanda hagenda hashyingurwa imibiri y’abazize Jenoside itarabonetse kera

Kuwa 10/4/2014 mu Kibare, Umurenge wa Mutendeli, Akarere ka Ngoma, hari umugabo wihanukiriye aravuga ngo nta Jenoside yabaye, akomeza avuga ngo ishyaka azi ni MRND ko ngo FPR ntacyo yamumariye.

Kuwa 10/4/2014 ,hari umudamu wagaragaje ko arimo abiba amacakubiri aho yigisha abanyeshuri muri G.S Kibare, aho yababwiraga ngo berekane ubwoko bwabo ku kibaho.Yari yanditse HUTU, TUTSI ,TWA ,noneho abana bakora ahanditse HUTU bose. Ahitamo abo abwira ngo berekane ahanditse TUTSI. Nuko akaza kwigisha ibiranga umututsi , birimo izuru rirerire n’ibindi. Ibyo ngo byatumye abana batangira kwitegerazenya no kugira aho bishyira muri ibyo bice.

Kuwa 10/4/2014, mu murenge wa Ntyazo ,Akarere ka Nyanza , hari umugabo wadukiriye umugore we aramuhondagura ngo amuziza gusa ko ajya mubiganiro mu cyunamo.

Naho mu mudugudu wa Kagarama , Akagali ka Musongati ,Umurenge wa Nyarusange ,Akarere ka Muhanga ,kuwa 12/4/2014 igihe cya saa tatu z’ijoro, umugabo w’imyaka 52, yaratashye nimugoroba asanga umugore we w’imyaka 50 wacitse ku icumu yenze ibitoki.Umugabo aramubaza ati wenze ibyo bitoki wabibwiwe na nde ?Arongera aramubwira ati : “nakwica nkakujyana ku rwibutso aho nyoko ashyinguye nkajya mbararirira hamwe naje ku irondo”.

Kuwa 13/4/2014, mu mudugudu wa Zegenya, Akagali ka Nsibo, Umurenge wa Nyange , Akarere ka Ngororero mu rugo rw’umukobwa wacitse ku icumu, abantu bataramenyekana bagiye iwe bajya mu kiraro basatura inka ye ugutwi.

Kuwa 13/4/2014 nanone nko mu ma saa saba , mu mudugudu wa Rugarama, Akagali Bwinyana , Umurenge wa Bweramana, Akarere ka Ruhango, hari umugabo wabwiye umugore n’umugabo at “Kabishwe barabishe babahoye ubugome bwanyu” ati “ N’ubu tuzabica tubamare”. Ibi yabivuze kubera ko bari bamubujije kunywera itabi mu bantu abatumuriraho ibyotsi.

Tariki ya 13/4/2014 mu murenge wa Matimba, Akarere ka Nyagatare, umuntu utazwi yazanye inyandiko idasinye, ntawe umureba ayishyira mu rugo rw’umugore umwe, ivuga ngo wowe kanaka tuzagushyira aho bene wanyu bagiye ndetse nayambwakazi gitifu w’Akagali ndetse n’uw’Umurenge, dore ko wagira ngo ni musaza wanyu, Abatutsi mwese muragashira.

Umukozi muri CNLG, Gasasira Gaspard, ati “Utu ni ducye mu bimaze kugaragara…amazina arazwi uwayakenera nayo yayabona kuko ibyinshi byabaye ku manywa y’ihangu. Inzira rero iracyari ndende , ariko icyiza muri ibi ni uko abagifite ibi bitekerezo ari bacye cyane. Rubyiruko rero aheza h’igihugu cyanyu ni mwe dukesha isuku yaho. Mwime amatwi amagambo nk’aya nimuyumva, ndetse uwo riciye mu kanwa mumwamagane kuko arabononera , arabasibira inzira ibaganisha aheza h’igihugu cyanyu.”

Ingingo ya 135 mu gitabo cy’amategeko ahana y’u Rwanda iteganya ko umuntu wese ukoze icyaha cy‟ingengabitekerezo ya jenoside n‟ibindi byaha bifitanye isano na yo ahanishwa igifungo kirenze imyaka itanu (5) kugeza ku myaka icyenda (9) n’ihazabu y‟amafaranga y‟u Rwanda kuva ku bihumbi ijana (100.000) kugeza kuri miliyoni imwe (1.000.000). End

Source Igihe.com

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s