21 st Commemoration

30 bamaze gutabwa muri yombi ku ngengabitekerezo

Kuri sitasiyo ya polisi ya Nyakarambi mu karere ka Kirehe hafungiye abantu babiri bakekwaho ibyaha by’ingengabitekerezo ya Jenoside no gupfobya Jenoside yakorewe Abatutsi mu 1994. Mu gihe kiri munsi y’icyumweru kimwe abamaze gukurikiranwaho icyaha cy’ingengabitekerezo ya Jenoside baragera kuri 30

Uwitwa Seminani Emmanuel na mushiki we bo mu kagari ka Kagasa, Umurenge wa Nyamugari, akarere ka Kirehe bakurikiranyweho kuvuga amagambo apfobya Jenoside yakorewe Abatutsi.

Uwamwiza Chantal, Umunyamabanga Nshingwabikorwa w’Umurenge wa Nyamugari yabwiye IGIHE ko abo bantu babiri koko bari mu maboko ya polisi nyuma y’aho kuwa Gatanu tariki 10 Mata ubwo bari hamwe n’abandi mu biganiro byo kwibuka ku nshuro ya 21Jenoside yakorewe abatutsi, bumvikanye mu ruhame bavuga amagambo yuje ipfobya n’ihakana rya Jenoside.

Yagize ati “Ni byo koko ayo magambo bayavuze ku munsi w’ejo saa munani n’iminota makumyabiri bari mu biganiro.”

Seminani yahagurutse mu ruhame avuga ko atakwibuka Abatutsi, keretse babanje kwibuka nyina wishwe ajya mu ntambara ndetse ngo n’imbwa z’iwabo zapfuye ntabwo bazibutse, n’andi magambo menshi apfobya.

Mbere yo gufatwa na Polisi bamenaguye ibiro by’akagari ka Kagasa, banakomeretsa umusaza wacitse ku icumu, bavuga ngo reka bamwice na we azibukwe nk’abandi batutsi.

Umunyamabanga Nshingwabikorwa w’Umurenge wa Nyamugari avuga ko ibyaha nk’ibyo bitari bisanzwe muri uwo murenge, asaba Abanyarwanda kwirinda amagambo mabi akomeretsa kandi apfobya Jenoside yakorewe Abatutsi.

Ibyo uwo musore yakoze yanabikomerekeyemo intoki

Ati “Ndasaba Abanyarwanda kuzirikana ko gupfobya Jenoside ari icyaha gihanwa n’amategeko kandi ari ugukomeretsa Abacitse ku icumu,twirinde rero amagambo ahakana ndetse akanapfobya Jenoside”.

Itegeko nimero 84/2013 ryo kuwa 11 Nzeli 2013 ryerekeye icyaha cy’ingengabitekerezo ya jenoside n’ibindi byaha bifitanye isano na yo, mu ngingo yaryo ya gatanu rigira riti: “Guhakana jenoside ni igikorwa icyo ari cyo cyose gikozwe ku bushake kandi mu ruhame kigamije:

1° kuvuga cyangwa kugaragaza ko jenoside atari jenoside;

2° kugoreka ukuri kuri jenoside kugira ngo uyobye rubanda;

3° kwemeza ko mu Rwanda habaye jenoside ebyiri;

4° kuvuga cyangwa kugaragaza ko Jenoside yakorewe Abatutsi itateguwe. Umuntu wese, ukora igikorwa kivugwa mu gika kibanziriza iki, aba akoze icyaha cyo guhakana jenoside.”

Ingingo ya gatandatu y’iri tegeko igira iti “Gupfobya jenoside ni imyitwarire iyo ari yo yose igambiriwe kandi igaragajwe mu ruhame mu buryo ubwo ari bwo bwose, igamije:

1° kugabanya uburemere cyangwa ingaruka ya jenoside;

2° koroshya uburyo jenoside yakozwemo. Umuntu wese, ukora igikorwa kivugwa mu gika kibanziriza iki, aba akoze icyaha cyo gupfobya jenoside.”

Ni muri urwo rwego hashyizweho amategeko kugira ngo hahanwe abakoze ndetse n’abategura gukora iki cyaha cyibasira inyokomuntu, no kurwanya ko cyakongera kuba ukundi mu Rwanda.

Ingingo ya 135 y’igitabo cy’amategeko ahana y’u Rwanda ivuga ko umuntu wese ukoze icyaha cy’ingengabitekerezo ya jenoside n’ibindi byaha bifitanye isano na yo ahanishwa igifungo kuva ku myaka itanu (5) kugeza ku icyenda (9) n’ihazabu y’amafaranga y’u Rwanda kuva ku bihumbi ijana (100.000) kugeza kuri miliyoni imwe (1.000.000).

Imibare yegeranyijwe n’ishami rya Polisi y’u Rwanda ry’ubugenzacyaha (Criminal Investigation Department- CID) yerekana ko 36% y’ibyaha 138 by’ingengabitekerezo ya jenoside byakozwe mu mwaka ushize (wa 2014), byakozwe mu kwezi kwa Mata.

Muri iki gihe cyo kwibuka ku nshuro ya 21 Jenoside yakorewe abatutsi abantu 30 ni bo bamaze gufatwa na polisi bakurikiranweho ibyaha nk’ibyo by’ingengabitekerezo ya Jenoside, kuyipfobya ndetse no kuyihakana. End Inkuru ya Igihe.com

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s