Memory

Bishop Rucyahana yasobanuye imvugo ye yafashwe nko gukomeretsa abarokotse Jenoside

rucyahana_2jac54-91ead

Rucyahana John. Photo Igihe.com

Perezida wa Komisiyo y’Igihugu y’Ubumwe n’Ubwiyunge, Bishop John Rucyahana, yongeye gushimangira ko gutanga ubuhamya bw’ibyabaye muri Jenoside yakorewe Abatutsi bidakwiye guharirwa abayirokotse gusa.

Ni igitekerezo kitavuzweho rumwe n’ab’ingeri zinyuranye benshi bahuriza ko gipfobya ubuhamya bwatanzwe n’abarokotse Jenoside mu myaka hafi 25 ishize.

Mu kiganiro cyihariye na IGIHE, Bishop John Rucyahana, yashimangiye ko buri muntu afite uburenganzira bwo gutanga igitekerezo ku byo yavuze.

Ni ikiganiro cyagarutse ku ngingo nyinshi zirimo izijyanye n’ubumwe n’ubwiyunge nk’urwego amaze imyaka myinshi akurikiye ndetse no ku mibereho ye bwite.

Ubusanzwe Rucyahana yavukiye mu Karere ka Burera mu Ugushyingo 1945, amashuri abanza ayigira ahitwa Kinoni, Gitare n’i Murunda.

Ni umwe mu mfura z’ishuri ryisumbuye Inyemeramihigo ryahoze ryitwa‘College d’Humanité Moderne’ mu Karere ka Rubavu.

Nyuma yo kurangiza amashuri yisumbuye yahungiye muri Uganda, yigayo ibijyanye na Tewolojiya, akomereza muri Leta Zunze Ubumwe za Amerika aho yakuye Impamyabumenyi y’Icyiciro cya Gatatu cya Kaminuza muri Tewolojiya.

Arangije kwiga yabaye pasiteri akora no muri Komisiyo y’Ivugabutumwa mu Itorero Anglican aza no kuba Bishop muri Diyoseze ya Shyira.

Yabaye umwarimu mu mashuri abanza ndetse n’ayisumbuye. Ni we washinze ‘Sunrise School’ mu Karere ka Musanze, akaba yaranaribereye umwarimu. Ubu ari mu kiruhuko cy’izabukuru mu Itorero Anglican.

Ikiganiro yagiranye na IGIHE

IGIHE: Imvugo yanyu y’uko gutanga ubuhamya mu cyunamo bidakwiye guharirwa abacitse ku icumu ntiyakiriwe neza na benshi. Bamwe basabye ko usobanura neza icyo washaga kuvuga.

Bishop Rucyahana: Abatarakiriye neza ubutumwa tuvuga bafite umudendezo n’uburenganzira bwo kumva uko babyumva kandi bafite n’uburenganzira bwo kubivuga.

U Rwanda ni urw’abanyarwanda na Jenoside yakorewe Abatutsi ni ishyano ryabaye mu Rwanda rikorerwa Abatutsi b’Abanyarwanda rikorwa n’Abanyarwanda, ariko amateka n’ubuhamya bw’ayo mateka ntibigomba guharirwa abakorerwaga amarorerwa gusa.

Bamwe babyumvaga ko ari ukuvuga ngo abakoze Jenoside abe aribo batanga ubuhamya. Oya hari abandi batakoze Jenoside babireberaga.

Hari ababonye aho Abatutsi bicwaga muri Jenoside imibiri yabo yagiye ishyirwa, abacitse ku icumu ntibahazi ariko hari ababibonye bagomba gutanga ubwo buhamya kugira ngo ya mibiri ishyingurwe.

Hari abandi bantu bafite amakuru yafasha abanyarwanda gukira vuba, bakanahumuriza abacitse ku icumu, bacecetse, abo bantu nabo bagomba kugirwa inama yo gutanga ubuhamya.

IGIHE: Nk’umwana wariho mu gihe cya Jenoside, ni ubuhe buhamya agomba gutanga?

Bishop Rucyahana: Ntiwagereranya igikomere cy’uwacitse ku icumu n’igikomere cy’ucirwa urubanza rw’uko yakoze Jenoside cyangwa umwana utarayikoze ariko akaba acirwa n’urubanza n’uko se yayikoze. Uwo mwana agomba gutanga ubuhamya bw’ibyo azi kuri se kandi akitandukanya nabyo, ariko agomba kuvuga.

IGIHE: Kuba iyi ngingo itarakiriwe neza ntacyo byahinduye mu mitekerereze yawe?

Bishop Rucyahana: Njye ntabwo mbacira urubanza nta nubwo bimbabaje rwose ko babivuze kandi ntibizambuza kuvuga no gushishikariza abanyarwanda gukora icyo bagomba gukora kuko niba umwana yihannye ko ababyeyi be bakoze Jenoside ntabwo byari bikwiye guhungabanya uwacitse ku icumu.

Wa wundi wabonye aho bashyize imibiri y’abishwe muri Jenoside agaceceka ntabivuge kuko adashaka kubabaza uwacitse ku icumu, azamubabaza [uwacitse ku icumu] kurushaho kuko akomeza kurira no kubabara no kugira agahinda kuko atashyinguye uwe. Ariko igihe utanze ubuhamya wa wundi arababara akarira agashyingura uwo muntu akazagera ubwo aruhuka.

IGIHE: Ese ubona ari iyihe mpamvu abantu bamwe badakangukira gutanga ubuhamya bw’ibyo babonye?

Bishop Rucyahana: No kubabwira ngo mubivuge ntabwo byoroshye, ariko nimubivuge dukire twese. Uzi kugira ngo ube wariciwe umuntu atari urupfu ari urugomo, ari ubugome, ubure no kumushyingura hari ubizi acecetse.

Uranyumvira agahinda uriya muntu wacitse ku icumu afite? Kubura uwe akabura n’umurambo ngo awushyingure hari ubizi ucecetse kandi wabwira uriya muntu ngo abivuge kuko atinya ko ari ukumukomeretsa akababara kandi ni uburyo bwaturuhura twese nk’umuryango nyarwanda.

IGIHE: Ubona imibanire y’abanyarwanda iganisha ku bumwe n’ubwiyunge ihagaze he muri iki gihe?

Bishop Rucyahana Aho tugeze uyu munsi ni heza turashima Perezida Kagame, turashima Leta y’u Rwanda, turashima buri munyarwanda wese wihanganye kuva aho twari turi hahandi tukaba tugeze aho tugeze uyu munsi ni heza. Ariko turacyafite urugendo rurerure ntabwo birera ndo de.

IGIHE: Tujya twumva imiryango imwe n’imwe idashyingirana kubera amoko. Ni bimwe mu bitarera ngo de?

Bishop Rucyahana: U Rwanda aho tugeze uyu munsi naseka, kuko tugeze aho bigaragara ko bishoboka naho ibyo gushyingirana n’ubu abahutu n’abatutsi barashakana.

Hari n’uwasigajwe inyuma n’amateka wambwiye ko yashyingiranwe n’undi munyarwandakazi utari uwasigajwe inyuma n’amateka, baragenda bashyingirana hirya no hino. Ariko icyo si cyo gipimo, uko babana ntabwo birera ngo de. Turacyafite abagisitara ku myanzuro ya gacaca, turacyafite abatarashobora kwatura ibyo bakoze.

IGIHE: Benshi mu bagukurikira, bakubona nk’umunyapolitiki kurusha umupasiteri. Nihe wowe wisanga cyane?

Bishop Rucyahana: Abambona batyo nabanza kureba ngasuzuma amaso yabo uko areba n’uko ntabishobora. Ubumwe n’ubwiyunge ni ikintu Leta yashyizeho ariko kiri muri Bibiliya.

Abo bavuga ko ndi umunyapolitike ntakorera Imana ntibasomye Bibiliya, muzababwire bajye gusoma mu 2 Abakolinto 5, Abefeso 2 n’igice cya 4, barebe icyo duhamagarirwa. Ni ukugira ngo dukundane, ni ukugira ngo tugire ubumwe. Nicyo nshinzwe muri Komisiyo y’Ubumwe n’Ubwiyunge.

IGIHE: Ni iki mwishimira mu buzima bwanyu uyu munsi?

Bishop Rucyahana: Ikintu cyanejeje mu buzima bwanjye ni uko nakiriye umwami Yesu nkamenya ko ari umukiza wanjye, akanyobora kandi akaba yarankijije.

Nkaba nkorera abanyarwanda mfite umutima nama unyemeza gukora ibyo ngomba gukorera Imana n’abanyarwanda bagenzi banjye.

IGIHE: Ni iki cyakubabaje?

Bishop Rucyahana: Icyambabaje rero ni ukuba narabaye mu buzima bwacishijwe bugufi ntiyumvamo icyo ngomba kuba ndicyo. Guteshwa agaciro nk’umunyarwanda no kuba mu buzima butari uwo ndi we, ukaba Uganda cyangwa ukaba ahariho hose wumva uri mu ntambara yo gushaka kumenya uwo uri we ariko ntube uwo uri we kubera aho uri.

Ibyo nicuza byo ni byinshi cyane, hari ibyo ntakoze kuko ntari mfite ubushobozi bwo kubikora, ibyo ntabwo bincira urubanza kuko ntari mfite ubushobozi bwo kubikora. Hari ibyo ntavuze nagombaga kuvuga, ariko ntafite uburyo bwo kubivuga cyangwa kubera uko nari meze. Ibyo ni ibintu wicuza mu buzima bwawe.

Mu buzima twabayemo hari igihe utakoraga icyo wagombaga gukora kuko utari ufite ubushobozi bwo kugikora, hari icyo wagombaga kuvuga ntukivuge kuko udafite ubushobozi naho uvugira. Ibyo rero bikubabaza mu buryo udashobora kubyiyumvisha.

IGIHE: U Rwanda wifuza kuraga abana bawe ni urumeze rute?

Bishop Rucyahana: Ni aho umunyarwanda n’umunyarwandakazi azaba afite agaciro n’umunezero wo kuba mu Rwanda rumuhesheje ishema nk’umunyarwanda, ariko kandi nibutsa n’abanyarwanda n’abo bana nduraga ko bagomba kugira umuhate n’inshingano zo kurugira icyo ruri rwo.

Source: Igihe.com/ Emma-Marie Umurerwa. Feb7/2019.

Categories: Memory

Tagged as: , ,

3 replies »

  1. 1/Abishe abantu cg abafitanye isano n’ababishe ntabwo kuvuga aho abo bishe bari bisaba ko ajya mu gihe cyo kwibuka ngo atange ubuhamya , ashatse gutanga amakuru aho yajya harahari hatandukanye.

    2/ Hari ikintu cyabaye urwitazo cg se gishaka gutuma Abacitse ku Icumu rya Genocide yakorewe Abatutsi nyuma yo gukokorwa bakabamaraho ababo ,bazajya birirwa binginga ababiciye kubereka ababo! Urwo rwitwazo rugomba kuvaho .
    Abacu bishe hashize imyaka 25 tutarababona narabyakiriye kuko ntabwo nubundi kubabona barashwanyaguritse aribyo byabangarurira ,byanansubiza n’inyuma kurushaho, Imana Isumba byose abampere kuruhukira mu mahoro.
    Ntabwo rero kuberekwa n’ababishe aricyo cyaba impamvu yo guhabwa ijambo, mu gihe ndi mu gahinda mbibuka .

    3/ Ese ko ntawuzi ibiba mu mutima w’umuntu ,uwo mwicanyi igihe yahawe micro akabatungura akishongora akivuga ibigwi nkuko hari aho byagiye biba muri Gacaca,imitima azakomeretsa aho bazayigarurira he ?

    Liked by 1 person

  2. Jye uyu mugabo hari aho tubyumva kimwe nigeze no kubisaba ngo tuzegere umuntu wampishe utarigeze akora amaraso azaduhe amakuru yose y’ibyabereye iwacu kuko byose yarabibonye ni ababiteguraga bose arabazi ariko numva ntibyitaweho ariko hari ibyo tubura byakuzuza uko byagenze ndetse tukamenya mubyukuri ni ababikoze bose kuko hari ibyo twe tutabashaga kubona . Ni umuti usharira ariko dukwiye kuzahumiriza tukawunywa niba dushaka kwandika amateka yacu yose. Kudukomeretsa byo dukomereka buri munsi no guturana ni uwakwiciye umubona uko bukeye twarabyakiriye ariko ndibazako dufite ibibazo byinshi twibaza bitazabona ibisubizo nidukomeza kubyishakamo. Erega buriya nabo amabanga yabo yaba asohotse uzi ukuntu baziko batwifatiye ahari kuberako tutazi ibyo bagiye bakora byose. Kuri jye nabaha ijambo bakavuga kuko nitwe tuzabyungukiramo sibo. Ntibizongere kubaho. Mukomere kandi

    Like

Leave a Reply to MULISA Cancel reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s